Муҳаммад Салах ва Арне Слот ўртасидаги низо: Ливерпулда ички муҳит бузилмоқда
2024-йилнинг апрель ойида Муҳаммад Салах ва Юрген Клопп ўртасида Вест Ҳем билан ўйиндаги дурангдан сўнг келишмовчилик юзага келган эди. Ўшанда мисрлик ҳужумчи журналистларга: "Агар гапирсам, олов чиқади", деб вазиятни кескинлаштирмасликка қарор қилганди. Клопп барибир кетаётгани сабабли, Салах клуб афсонаси билан муносабатларни бутунлай бузишни истамаган эди. Бу ҳақда Goal.com хабар беради.
Бироқ, Клоппнинг ўрнини эгаллаган Арне Слот билан боғлиқ вазият бутунлай бошқача тус олди. Салах ўзининг сўнгги баёнотларида нидерландиялик мутахассисни очиқчасига танқид қилишдан тийилмади. Гарчи у мураббийнинг исмини тилга олмаган бўлса-да, унинг Instagramдаги пости ва жамоадошларининг унга билдирган муносабати нишон айнан ким эканлигини яққол кўрсатиб турибди.
Бу Салахнинг жорий мавсумда Слотга қарши учинчи марта "ҳужум" қилиши бўлди. Ливерпул Муҳаммад Салахнинг мавсум якунланмасидан олдин жамоани тарк этишини тасдиқлаганидан сўнг, ҳужумчи жим кетмаслиги маълум бўлиб қолди. Тўққиз йил давомида Энфилдда тўп сурган юлдуз ўз норозилигини ҳар доим турли йўллар билан намойиш этиб келган.
Ўтган мавсумда Ливерпулни Англия Премер-лигаси чемпионлигига етаклаган футболчининг захира ўриндиғига михланиши вазиятни янада оғирлаштирди. Салах клубдаги "кимдир" уни жамоанинг сўнгги 71 йилдаги энг ёмон натижалари учун айбдор қилмоқчи эканлигини ва мураббий билан муносабатлари бутунлай узилганини таъкидлади.
Салахнинг бундай хатти-ҳаракатлари футбол жамоатчилиги ва собиқ футболчилар томонидан кескин танқид қилинмоқда. Клубнинг ички сирларини оммага олиб чиқиш Ливерпулнинг азалий қоидаларига зид экани ва бу профессионализмга тўғри келмаслиги айтилмоқда.
