Рафиня Ламине Ямал билан муносабатлари ҳақида: Агар хато қилса, уни уришиб берамиз
Барселона юлдузи Рафиня жамоанинг ёш иқтидори Ламине Ямал билан бўлган муносабатлари ҳақида сўзлаб берди. Бразилиялик вингер ўзини ёш футболчи учун мураббий ва акадек ҳис қилишини, зарурат туғилганда унга танбеҳ беришдан ҳам қайтмаслигини маълум қилди. Камп Ноуда етакчилик ролини ўз зиммасига олган Рафиня 17 ёшли футболчини ўзининг укасидек кўришини таъкидлади. Бу ҳақда Goal.com хабар беради.
Рафиня ва Ямал ўртасидаги майдондаги ва ундан ташқаридаги яқинлик жорий мавсумда Барселона муваффақиятларининг муҳим омилларидан бирига айланди. Уларнинг биргаликдаги голларни нишонлаши ижтимоий тармоқларда тез-тез оммалашиб бормоқда. Бразилиялик футболчининг тушунтиришича, бу алоқа шунчаки тактик кўрсатмаларга эмас, балки чуқур шахсий боғлиқликка асосланган.
"У мендан 11 ёш кичик. Уни ҳақиқатан ҳам укамдек кўраман, ҳатто у ўз укамдан ҳам ёшроқ. Шунинг учун унга қўлимдан келганча маслаҳат беришга ҳаракат қиламан. Бизнинг биргаликдаги қувончимизга келсак, буни интернетда кўриб қолдик ва бирга бажаришга келишиб олдик. Бу шунчаки биродарлик рамзи", — деди Рафиня ТНТ Sportс нашрига берган интервюсида.
Рафиня Ямалнинг ғайритабиий иқтидорини юқори баҳолаган бўлса-да, ҳатто энг ёрқин юлдузлар ҳам интизомга муҳтожлигини қайд этди. Унинг сўзларига кўра, агар ёш футболчи диққатини йўқотса, Барселона таркибидаги тажрибали ўйинчилар дарҳол вазиятга аралашишади. Рафиня унга ҳаётий тажрибасини ўргатишга интилишини, аммо Ямалнинг туғма иқтидорини ўргатиб бўлмаслигини айтди.
"У жуда яхши бола, доим қулоқ солади ва маслаҳат сўрайди. Агар у бирор аҳмоқлик қилса, биз уни уришиб берамиз ва у буни тўғри қабул қилади. Арамиздаги 11 йиллик фарқга қарамай, муносабатларимиз аъло даражада", — дея қўшимча қилди бразилиялик футболчи. Шунингдек, у Ямал билан келажакда Бразилия ва Испания терма жамоалари сафида Жаҳон чемпионати финалида тўқнаш келишни орзу қилишини ҳам яширмади.
