Эрон янги Mohajer-10 дронини тақдим этди (видео)

Эрон Мудофаа саноати куни муносабати билан янги Mohajer-10 дрони намойиш қилинди. Бу ҳақда Mehr News Agency хабар берди.

7 километрдан ортиқ баландликда ва 2000 километр масофада 24 соат узлуксиз парвоз қила оладиган Mohajer-10 дрони Эрон президенти Иброҳим Раисий иштирокида тақдим этилди. Раисий мамлакат мудофаа саноатининг сўнгги ютуқлари акс этган кўргазмага ташриф буюрди.

Mohajer-10 дронининг максимал ёнилғи сиғими 450 литр, юкининг максимал оғирлиги эса 300 килограмм.

Дроннинг максимал тезлиги соатига 210 километрни ташкил этади, у барча турдаги ўқ-дорилар ва бомбаларни олиб юриши мумкин, шунингдек, электрон уруш ва разведка тизимлари билан жиҳозланган.