Таиландда дунёдаги энг йирик электромотоцикл яратилди

^{Фото: Europaplus}
Бангкокда бўлиб ўтган 45-халқаро автосалонда Таиланднинг Smartech компанияси томонидан Felo TOOZ электромотоциклининг намунаси намойиш этилди.

Фестивалда мазкур гаджет дунёдаги энг катта ва тезюрар мотоцикл эканлиги таъкидланди. У 201 км/соат тезликка бир неча сонияларда чиқа олади.

^{Фото: Newatlas}
Felo TOOZ’га ўрнатилган 35 кВт/соат қувватли аккумулятор 720 километргача масофа учун қувват захирасини таъминлайди. Унинг батареяси тез зарядлаш функциясига эга: атиги 20 дақиқада электромотоцикл зарядини 20 дан 80 фоизгача тўлдириши мумкин.

^{Фото: Newatlas}
Felo TOOZ ёрдамида барча турдаги қурилмалар ва электр жиҳозларининг аккумуляторларини зарядлаш мумкин. Унинг қуввати ҳатто бутун бошли хонадонни энергия билан таъминлашга етади.

^{Фото: Newatlas}
Шунингдек, электромотоциклнинг бой техник таркиби шиналар босими ва тормозлашни мустақил назорат қилиш имконини беради. Мотоциклда 360 даража кенгликда суратга олувчи махсус камералар тизими ҳам ўрнатилган.

Лойиҳа ташкилотчилари мазкур мотоциклни ишлаб чиқариш масаласи ва унинг нархлари бўйича маълумотларни кейинроқ ошкор қилишга ваъда берган.