Olmaota aeroportida “vor v zakone” qo‘lga olindi

^{Foto: “Praym Kraym”}

Olmaota aeroportida jinoiy doiralarda Samar nomi bilan tanilgan 53 yoshli qonundagi o‘g‘ri Samarkan Axmetov qo‘lga olindi. Bu haqda “Zakon.kz” xabar berdi.

Ma’lum qilinishicha, u shubha uyg‘otmaslik uchun parvoz vaqtida birovning nomiga soxta hujjatlardan foydalangan. Samar 13 yanvar kuni Olmaota xalqaro aeroportida davlat chegarasini kesib o‘tishga uringan payt qo‘lga olingan. U 2013 yildan beri xalqaro qidiruvda bo‘lgan.

Samar laqabli Samarkan Axmetov 1970 yilda tug‘ilgan. Unga nisbatan 2013 yilda Atirau viloyatida jinoiy ish ochilgan, u o‘ta og‘ir jinoyatlarni sodir etganlikda ayblangan.

Axmetov 2012 yilda toj kiygan qonundagi o‘g‘ri sifatida tanilgan. O‘shanda, mart oyining o‘rtalarida Gretsiyada o‘g‘rilar yig‘ilishi bo‘lib o‘tgan, unda 5 nafar “qonundagi o‘g‘rilar” toj kiyishgan. Tashabbuskorlarning eng keksasi G‘arbiy Qozog‘iston viloyati Uralsk shahrida yashovchi 41 yoshli Samarkan Axmetov bo‘lgan.