Tramp: Yevropa mamlakatlari halokat yo‘liga kirib bormoqda
AQSH prezidenti Donald Tramp Yevropa mamlakatlarini migratsiya inqirozini bartaraf eta olmayotgani uchun keskin tanqid qildi.
U Nyu-York shahrida bo‘lib o‘tayotgan BMT Bosh Assambleyasining 80-sessiyasidagi nutqida shu haqda gapirdi.
Trampning ta’kidlashicha, qit’ada migrantlar tomonidan amalga oshirilayotgan jinoyatlar soni tobora ko‘paymoqda. Shu bilan birga, Vashington bu muammoga yechim topganini ta’kidladi.
— Ishoning, men bu masalalarni yaxshi bilaman. Mamlakatlaringiz halokat yo‘liga kirib bormoqda. Amerikada biz nazoratsiz migratsiyani to‘xtatish uchun qat’iy choralar ko‘rdik. Chegaradan noqonuniy o‘tganlarni ushlab, deportatsiya qilishni boshlagandan keyin ular kelishni to‘xtatdi, — dedi u.
Trampning so‘zlariga ko‘ra, Yevropa hozir misli ko‘rilmagan noqonuniy muhojirlar to‘lqiniga duch kelgan va bu holatga qarshi hech qanday samarali chora ko‘rilmayapti.
