Bitcoin narxi 220 000 dollargacha koʻtarilishi kutilmoqda
Bitcoin (BTC) narxi 6-fevraldagi 60 000 dollardan past boʻlgan koʻrsatkichidan buyon qariyb 30 foizga oʻsdi. Koʻp yillik buqa bozori modeli shuni koʻrsatmoqdaki, yaqin oylarda BTC narxi 220 000 dollargacha koʻtarilishi mumkin. Bu haqda Cointelegraph.com xabar beradi.
Haftalik grafikda Bitcoin narxi "finjon va dasta" (cup-and-handle) modelini shakllantirdi. Bu model narxning yumaloq shaklda tiklanishi (finjon) va undan keyingi qisqa konsolidatsiya (dasta) bosqichini oʻz ichiga oladi. Odatda, bunday texnik holat narxning yuqoriga qarab keskin harakatlanishidan darak beradi.
Texnik tahlilchi Crypto Tice oʻzining X ijtimoiy tarmogʻidagi sahifasida Bitcoin koʻp yillik "finjon va dasta" modelini yakunlaganini maʼlum qildi. Ekspertning taʼkidlashicha, bunday breakout (yorib oʻtish) holatlari kichik harakatlar bilan cheklanib qolmaydi, balki narxning yuzlab foizga oʻsishiga sabab boʻladi.
Hozirda Bitcoin narxi finjonning 65 000 – 74 000 dollar atrofidagi "boʻyin chizigʻini" qayta sinovdan oʻtkazdi. Breakout muvaffaqiyatli yakunlanishi uchun narx ushbu darajadan yuqorida mustahkamlanishi kerak. Tahlilchining fikricha, qayta sinov jarayoni tugagan va navbatdagi bosqich narxning keskin parvozi boʻladi.
TradingView maʼlumotlariga koʻra, ushbu modelning yakuniy maqsadi 295 000 dollarni tashkil etadi, bu esa joriy narxdan taxminan 280 foiz yuqoridir. Avvalroq logarifmik narx modellari ham Bitcoin yil yakuniga qadar 255 000 dollargacha, 2027-yilga borib esa 308 000 dollargacha koʻtarilishi mumkinligini koʻrsatgan edi.
