Banca Sella Italiyada MiCA litsenziyasini olgan ilk bank boʻldi
Italiyaning Banca Sella banki Yevropa Ittifoqining Markets in Crypto-Assets (MiCA) reglamenti doirasida Italiya bankidan kripto-aktivlar bilan ishlash boʻyicha rasmiy ruxsatnomani qoʻlga kiritdi. Ushbu kelishuv natijasida Banca Sella mamlakatda kriptovalyuta xizmatlarini koʻrsatish huquqiga ega boʻlgan birinchi moliya muassasasiga aylandi. Bu haqda Cointelegraph.com xabar beradi.
Bank maʼlumotlariga koʻra, 2026-yilda mijozlarning maʼlum toifalari uchun raqamli aktivlarni saqlash, oʻtkazish va qabul qilishga yoʻnaltirilgan yangi yechim ishga tushiriladi. Sella Group tarkibiga kiruvchi ushbu tijorat banki hozirda 300 ga yaqin filial va 2400 dan ortiq xodimga ega boʻlib, Italiya bank sektorining tartibga solinadigan kripto-bozorga kirishini taʼminlaydi.
Banca Sella raqamli banking boʻyicha boshqaruvchi direktori Andrea Tessera tokenizatsiya jarayoni toʻlovlarni tezkor, oʻzaro mos keluvchi va dasturlashtiriladigan holatga keltirishini taʼkidladi. Bankning yangi kripto-xizmati aynan shu texnologik transformatsiyaning bir qismi sifatida koʻrilmoqda.
Shuningdek, Banca Sella yevro valyutasiga bogʻlangan stablecoin chiqarishni rejalashtirayotgan 37 ta Yevropa bankidan iborat Qivalis konsorsiumining asoschilaridan biri hisoblanadi. Bank avvalroq oʻzining Hype raqamli brendi orqali Bitcoin hamyon xizmatlarini joriy etgan va Italiya bankining Fintech Milano Hub loyihalarida faol ishtirok etib kelgan.
