«С5+1» sammiti rahbarlari qo‘shma bayonoti e’lon qilindi
19 sentyabr kuni BMT Bosh Assambleyasining 78-sessiyasi doirasida bo‘lib o‘tgan «S5+1» (Markaziy Osiyo + AQSH) sammiti rahbarlarining qo‘shma bayonoti Oq uy saytida e’lon qilindi.
Tomonlar savdo, energetika, iqlim va xavfsizlik kabi mavzularda o‘zaro hamkorlik qilishga e’tibor qaratdilar.
Qo‘shma bayonotning mazmuni quyidagicha:
- davlatlar barcha mamlakatlarning mustaqilligi, suvereniteti va hududiy yaxlitligini hurmat qiladi;
- S5+1 platformasi orqali hamkorlikni mustahkamlash, savdo, energetika, iqlim va xavfsizlik kabi mavzularda o‘zaro hamkorlik qilish va «jamoaviy yechim uchun yuqori darajadagi muloqotni davom ettirishga intilish» niyatida;
- «mintaqadagi murakkab muammolarni hal qilish va yuzaga kelayotgan tahdidlarni bartaraf etish uchun barqaror hamkorlik» qarashlariga qo‘shilish;
- global muammolarga mintaqaviy yechim topish bo‘yicha S5+1 maqsadlariga rioya qilish;
- Markaziy Osiyoda xavfsizlikni kuchaytirish, iqtisodiy barqarorlikni oshirish, barqaror rivojlanishni qo‘llab-quvvatlash, iqlim o‘zgarishiga qarshi kurashish va tinchlikni mustahkamlashga qaratilgan faoliyatni qo‘llab-quvvatlash;
- uchrashuv AQSH va Markaziy Osiyo davlatlari o‘rtasidagi hamkorlikning navbatdagi bobi bo‘lib, S5+1 mexanizmining muhimligini ta’kidlaydi;
- AQSH va Markaziy Osiyo davlatlari Afg‘onistondagi vaziyat sharoitida xavfsizlik sohasida hamkorlikni kuchaytirish niyatida;
- transport yo‘nalishlarini diversifikatsiya qilish uchun Transkaspiy savdo yo‘lini, energiya infratuzilmasini yanada rivojlantirish va Markaziy Osiyoni Janubiy Osiyo bilan bog‘lovchi transport tarmoqlarini kengaytirish.
Eslatib o‘tamiz, O‘zbekiston prezidenti Shavkat Mirziyoyev Nyu-York shahriga tashrif dasturiga muvofiq 19 sentyabr kuni Markaziy Osiyo mamlakatlari va Amerika Qo‘shma Shtatlari yetakchilarining «C5+1» formatidagi birinchi sammitida ishtirok etdi.
Tadbirda AQSH prezidenti Jozef Bayden, Qozog‘iston prezidenti Qosim-Jo‘mart To‘qayev, Qirg‘iziston prezidenti Sadir Japarov, Tojikiston prezidenti Emomali Rahmon va Turkmaniston prezidenti Serdar Berdimuhamedov qatnashdi.
