Toshkentda mushuklar uchun “mehmonxona” qurildi
Foto: Toshkent shahar hokimligi axborot xizmati
Toshkent shahar Uchtepa tumanida mushuklar uchun mehmonxona qurildi. Bu haqda shahar hokimligi axborot xizmati xabar berdi.
Ma’lum qilinishicha, Uchtepa tumanida joylashgan “Vatan” mahallasida noodatiy mehmonxona qad rostladi. Ko‘ngillilar tashabbusi va mahalla aholisining roziligi bilan bunyod etilgan o‘ziga xos “mehmonxona” ko‘cha mushuklari uchun issiqqina boshpana vazifasini bajaradi.
“Ushbu mushuklar mehmonxonasi Mushukkent loyihasi va Toshkent shahar IIBB himoyasida bo‘lib, mahallada yashovchi bolalarni jonivorlarga mehrli bo‘lishga o‘rgatadi.
O‘z navbatida, Mushukkent loyihasi, \'Vatan\' mahallasining aholisi va ko‘ngilli fuqarolarimizga mehrga muhtoj jonivorlarga ko‘rsatayotgan g‘amxo‘rligi uchun minnatdorlik bildiramiz”, — deyiladi hokimlik xabarida.
