Toshkentda ayolga shahvoniy shilqimlik qilgan yigit 5 sutkaga qamaldi
Kecha, 9-sentabr kuni Jinoyat ishlari bo‘yicha Toshkent shahri Mirzo Ulug‘bek tuman sudida ayolga nisbatan shahvoniy shilqimlik qilgan yigit ustidan ma’muriy ish ko‘rib chiqildi, deb xabar berdi Nemolchi.uz.
Ma’lumotlarga ko‘ra, 8-sentabr kuni bir ayol ko‘p qavatli uyiga qaytayotganida ortidan 19 yoshli B.T. ismli yigit pod\'yezga kirgan. U ayoldan telefon raqamini so‘ragan, rad javobini eshitgach, unga jismoniy tegajog‘lik qilgan.
Ayol qichqirganidan so‘ng u qo‘rqib qochib ketgan. Tez orada huquq-tartibot organlari tomonidan ushlandi. Sudda aybini tan olgan yigitga Ma’muriy javobgarlik to‘g‘risidagi kodeksning 41-1-moddasiga asosan 5 sutka qamoq jazosi tayinlandi.
Aniqlanishicha, u ilgari ham ma’muriy huquqbuzarlik sodir etgan bo‘lib, rasmiy ro‘yxatga olingan. Mutasaddilar bu kabi holatlar jamiyat xavfsizligiga tahdid solishini ta’kidlab, fuqarolarni hushyor bo‘lishga chaqirmoqda.
