Qashqadaryoda yirik gaz qoidabuzarligi bo‘yicha ish ochildi

Qarshi shahrida o‘tkazilgan nazorat tadbirida “M.Sh.Q.S.” MCHJga qarashli ko‘p qavatli turar-joy binosida tabiiy gazdan o‘zboshimchalik bilan, noqonuniy foydalanish holati aniqlangani ma’lum qilindi. Tekshiruv “O‘zenergoinspeksiya”ning Qashqadaryo viloyati hududiy boshqarmasi hamda gaz ta’minoti korxonasi hamkorligida o‘tkazilgan.

Dastlabki hisob-kitoblarga ko‘ra, mazkur qoidabuzarlik oqibatida 4 milliard 90 million so‘m miqdorida zarar yetkazilgani qayd etilgan.

Hozirda holat yuzasidan huquqni muhofaza qiluvchi organlar tomonidan tergovga qadar tekshiruv ishlari olib borilmoqda. Qisqasi: “gaz tekinga emas”, endi bu ishda kim va qanchaga “javob” berishini tekshiruv hal qiladi.