Shahrisabzda YPXning Tracker avtomashinasi yonib ketdi

3 fevral kuni Qashqadaryo viloyati Shahrisabz shahrida yo‘l-patrul xizmatiga tegishli Tracker rusumli xizmat avtomashinasida yong‘in yuz berdi. Bu haqda viloyat Ichki ishlar boshqarmasi ma’lum qildi.

Ma’lum qilinishicha, soat 13:40 atrofida shahar hududida davlat raqam belgisi 70/809VSF bo‘lgan Tracker avtomashinasining dvigatel qismida yong‘in chiqqan. Tezkor choralar ko‘rilib, olov qisqa vaqt ichida o‘chirilgan.

Hodisa oqibatida hech kim tan jarohati olmagan. Shuningdek, holat yuzasidan mas’ul xizmatlar tomonidan xizmat tekshiruvi boshlangani aytilmoqda.

Bildirilishicha, voqea sabablari o‘rganilmoqda va keyinchalik qo‘shimcha ma’lumot taqdim etiladi.