Rasman: JCH-2034 Saudiya Arabistonida bo‘ladi
2034 yilgi jahon chempionatining qaysi mamlakatda o‘tkazilishi ma’lum bo‘ldi.
FIFA 31 oktyabrga qadar mezbonlik uchun arizalarni qabul qildi. Unga ko‘ra, faqatgina Saudiya Arabistoni JCH-2034 mezbonligi uchun rasman ariza topshirdi. Shu tariqa, 2034 yilgi mundialga Saudiya Arabistoni mezbonlik qilishi ma’lum bo‘ldi.
FIFA prezidenti Janni Infantino ham JCH-2034 Saudiya Arabistonida o‘tkazilishini tasdiqlab, ijtimoiy tarmoqlarda bu haqda post qoldirgan.
«Futbol dunyoni birlashtiradi», - deya yozdi FIFA prezidenti.
Avvalroq, Avstraliya JCH-2034 mezbonligi uchun ariza topshirish fikridan qaytgani xabar qilingandi.
Eslatib o‘tamiz, JCH-2026 AQSH, Kanada va Meksikada bo‘lib o‘tsa, JCH-2030 Urugvay, Paragvay, Argentina, Marokash, Ispaniya va Portugaliyada o‘tkazilishi ma’lum qilingandi.
