Shaxmat Olimpiadasi. O‘zbekiston yigitlari 10-turda mag‘lub bo‘ldi

^{Foto: Uzchess}
Vengriya poytaxti Budapesht shahrida bo‘lib o‘tayotgan butunjahon shaxmat Olimpiadasida 10-tur bellashuvlari bugun, 21 sentyabr kuni yakunlandi.

Turning markaziy bahslaridan birida O‘zbekiston erkaklar jamoasi Xitoy bilan bahs olib bordi. Nodirbek Abdusattorovning durangi bilan boshlangan qarama-qarshilik yakunda o‘zbekistonliklarning mag‘lubiyati bilan tugadi. Shamsiddin Vohidovning g‘alabasi yakunda hech narsani hal qilmadi.

Erkaklar:

O‘zbekiston — Xitoy 1,5:2,5
- Nodirbek Abdusattorov — Ding Liren 0,5 : 0,5;
- Nodirbek Yakubboyev — Yi Vei 0:1;
- Javohir Sindorov — Yangyi Yu 0:1;
- Shamsiddin Vohidov — Yue Vang 1:0.

O‘zbekistonlik qizlar jamoasi Angliya ustidan g‘alaba qozondi. Nodira Nodirjonova hamda Umida Omonova raqiblari ustidan g‘alaba qozondi. Nilufar va Afro‘za durangga imzo chekdi.

^{Foto: Uzchess}
Qizlar:

O‘zbekiston — Angliya 3:1
- Afro‘za Hamdamova — Lan Yao 0,5 : 0,5;
- Nilufar Yakubboeva — Yovanka Ouska 0,5 : 0,5;
- Umida Omonova — Katarina Toma 1:0;
- Nodira Nodirjonova — Bodana Vivanandan 1:0.

Musobaqa yakuniga 1 ta tur qolganida Hindiston terma jamoasi AQSH jamoasini yengib ochkolar sonini 19 taga yetkazib oldi va muddatidan oldin chempionlikni qo‘lga kiritdi. O‘zbekiston jamoasi bronza medalini qo‘lga kiritish imkonini saqlab turibdi.

^{Foto: Chess}
Qizlar jamoasi g‘alabadan so‘ng 18-o‘ringa joylashdi. Ular hisobida 14 ochko mavjud. Turnir jadvalida Hindiston jamoasi yetakchilik qilmoqda. Qo‘shni Qozog‘iston qizlari ham musobaqa g‘olibi bo‘lish uchun yaxshi imkoniyatga ega.

^{Foto: Chess}
Ertaga, 22 sentyabr kuni musobaqaning so‘nggi hal qiluvchi tur uchrashuvlari bo‘lib o‘tadi.