PSV “Enfild”da tarixiy gʻalaba qozondi

Chempionlar ligasi guruh bosqichi 5-turida yana bir kutilmagan natija qayd etildi. “Liverpul” oʻz maydonida Niderlandiyaning PSV jamoasiga 1:4 hisobida imkoniyatni boy berdi.

Bu “Liverpul” tarixida Yevrokuboklar doirasida oʻz uy stadioni “Enfild”da ikkinchi marta toʻrtta gol oʻtkazib yuborishi boʻldi. Birinchi holat 2023-yilning fevral oyida Madridning “Real” klubiga qarshi oʻyinda roʻy bergan edi.

Oʻshanda “Liverpul” dastlab 2:0 hisobida oldinga chiqqan, ammo yakunda 2:5 hisobida magʻlub boʻlgandi. Endi “Liverpul” Chempionlar ligasidagi navbatdagi oʻyinini mehmondagi “Inter”ga qarshi oʻtkazadi.