Maynts bosh murabbiy Bo Henriksen bilan xayrlashdi

Futbol bo'yicha Germaniyaning "Maynts" klubi bosh murabbiy Bo Henriksen bilan xayrlashganini rasman e'lon qildi. 50 yoshli mutaxassis klubni 2024-yildan buyon boshqarib kelayotgan edi.

Bo Henriksen o'tgan mavsumda Bundesliganing eng yaxshi murabbiyi deb topilgan edi. U o'z jamoasini oltinchi o'ringa olib chiqib, Evropa musobaqalariga yo'llanma olib bergan.

Ammo joriy mavsumda "Maynts"ning natijalari juda muvaffaqiyatsiz kechmoqda. Hozirda jamoa turnir jadvalining eng quyi pog'onasida – 18-o'rinda joylashgan bo'lib, atigi 6 ochko to'plagan.

12 turdan keyingi holat bo'yicha jamoaning 15-o'rindagi raqibdan farqi uch ochkoni tashkil qilmoqda. Bo Henriksen avvalgi murabbiylik faoliyatida bir qancha Daniya klublarida ishlagan, shuningdek, Shveysariyaning "Syurix" jamoasini boshqargan.