Inter Karlos Augusto bilan shartnomani uzaytirishga tayyor

Karlos Augusto "Komo"ga qarshi o'yinda A Seriyadagi ilk golini kiritib, jamoa rahbariyatini o'zining shartnomasini uzaytirishga ishontirdi. Bu haqda Milan klubining muxlislari saytida – fcinter1908.itda xabar berildi.

Klub rahbariyati braziliyalik futbolchining universalligi va mehnatkashligini yuqori baholamoqda. Endi Augusto bilan shartnoma 2030-yilga qadar uzaytirilishi mumkin.

Shu bilan birga, futbolchining yillik maoshi 3 million yevroga oshirilishi kutilmoqda. Hozirda u har mavsum uchun 2,2 million yevro maosh olmoqda va uning amaldagi shartnomasi 2028-yilning yozida yakunlanadi.

Eslatib o‘tamiz, Karlos Augusto 2024-yildan buyon Milan klubida to‘p surib kelmoqda.