Vivo S60 seriyasi: 7200 mA·soat akkumulyator va IP69 himoyasi bilan taqdim etildi
Vivo kompaniyasi Xitoyda 29-may kuni rasman namoyish etiladigan yangi S60 smartfonlar seriyasining dizayni va texnik xususiyatlarini tasdiqladi. Turkumga asosiy model bilan bir qatorda hamyonbop S60 Vitality Edition versiyasi ham kiritilgan. Har ikkala qurilma allaqachon JD.com platformasida oldindan buyurtma berish uchun ochiq boʻlib, u yerda smartfonlarning ranglari va xotira konfiguratsiyalari maʼlum boʻldi. Bu haqda Ixbt.com xabar beradi.
Yangi smartfonlar yagona dizayn uslubida ishlangan boʻlib, Starry Sea, Early Summer Green va Midsummer Night kabi uch xil rangda sotuvga chiqadi. Asosiy Vivo S60 modeli 16 GB tezkor va 512 GB doimiy xotira bilan jihozlangan boʻlsa, Vitality Edition versiyasi 8/256 GB hajmdagi boshlangʻich konfiguratsiyada taklif etiladi.
Texnik jihatdan Vivo S60 ancha kuchli xususiyatlarga ega: u 1,5K aniqlikdagi va 120 Gs yangilanish chastotasiga ega 6,59 dyuymli OLED-displey bilan taʼminlangan. Qurilma Snapdragon 8s Gen 3 protsessori asosida ishlaydi. Smartfonning asosiy ustunligi — 90 W quvvatlanishni qoʻllab-quvvatlovchi ulkan 7200 mA·soat sigʻimli akkumulyatoridir.
Kamera tizimi 50 megapikselli asosiy modul va Sony IMX8 seriyasidagi periskopik teleobektivni oʻz ichiga oladi. Shuningdek, qurilma ekran ostidagi ultratovushli barmoq izi skaneri, IP68/IP69 suv va changdan himoya standartlari hamda OriginOS 6 qobigʻidagi Android 16 operatsion tizimi bilan jihozlangan.
