Latsio bosh murabbiyi Sarri yurak muammosi sabab operatsiya qildirdi
«Latsio» matbuot xizmati klub bosh murabbiyi Mauritsio Sarri yurakdagi muammolar tufayli jarrohlik amaliyotini boshdan kechirganini ma’lum qildi. Bu haqda euro-football.ru xabar beradi.
66 yoshli mutaxassisda bo‘lmachalar fibrillyatsiyasi aniqlangan — bu yurak urish ritmi buzilishi bo‘lib, insult yoki tromblar paydo bo‘lishi xavfini oshiradi. Sarri Tor Vergata klinikasida aritmiyani davolashda qo‘llanadigan kateterli ablyatsiya amaliyotidan o‘tdi. Operatsiyani professor Andrea Natale amalga oshirdi va u muvaffaqiyatli yakunlandi. Yaqin kunlarda Sarri jamoa boshqaruviga qaytishi kutilmoqda.
Mauritsio Sarri «Latsio»ni joriy yilda qabul qilib olgan. U avval ham rimliklarni 2021–2024 yillarda boshqargan. Murabbiylik faoliyati davomida Sarri ikki sovringa ega chiqqan: 2019 yilda «Chelsi» bilan Yevropa Ligasi hamda 2019/20 mavsumida «Yuventus» bilan A Seriya chempionligi.
