Trump Mobile mijozlarining shaxsiy maʻlumotlari tarqalib ketgani maʻlum boʻldi
AQSH prezidentining nomi bilan ataluvchi Trump Mobile mobil aloqa operatori va smartfon ishlab chiqaruvchisi mijozlarning shaxsiy maʻlumotlari, jumladan, pochta manzillari va elektron pochta manzillarini ochiq qoldirgani haqida xabarlar tarqaldi. Bu haqda oltin rangli T1 smartfoniga buyurtma bergan taniqli YouTuberlar Coffeezilla va penguinz0 maʻlum qildi. Ularning soʻzlariga koʻra, tadqiqotchilar internetda himoyalanmagan maʻlumotlar bazasini aniqlashgan. Bu haqda Techcrunch.com xabar beradi.
Kriptovalyuta firibgarliklarini fosh qilish bilan tanilgan Coffeezilla oʻzining ham ushbu sizib chiqish qurboniga aylanganini tasdiqladi. Uning taʻkidlashicha, kredit karta raqamlaridan tashqari deyarli barcha shaxsiy maʻlumotlar ochiq holatda qolgan. YouTuberlar ushbu qurilmani siyosiy qoʻllab-quvvatlash uchun emas, balki qiziqish yuzasidan sotib olishganini, biroq endilikda ularning maxfiyligi xavf ostida ekanini aytishmoqda.
Maʻlumotlarga koʻra, tadqiqotchilar Trump Mobile vakillari bilan bogʻlanishga urinishgan, biroq kompaniya tomonidan hech qanday javob boʻlmagan. Shu sababli, xavfsizlikdagi nuqson hali ham bartaraf etilmagan boʻlishi mumkin. YouTuberlar xakerlar ushbu maʻlumotlarga qanday kirishganini batafsil tushuntirishmadi, biroq bu jarayon juda oson ekanligini va maʻlumotlar hamon internetda mavjudligini bildirishdi.
Sizib chiqqan maʻlumotlardagi noyob identifikatorlarga tayanib, Coffeezilla hozirgacha atigi 30 000 kishi ushbu telefonni sotib olganini taxmin qilmoqda. Bu kutilganidan ancha past koʻrsatkichdir, chunki oʻtgan yili 590 000 ta oldindan buyurtma berilgani haqida taxminlar mavjud edi. Trump Mobile loyihasi dastlab toʻliq AQSHda ishlab chiqarilgan smartfon sifatida eʻlon qilingan edi.
Biroq, NBC News va The Verge kabi nashrlarning surishtiruvlari shuni koʻrsatdiki, qurilma marketing materiallarida endilikda faqat "Amerika qadriyatlari asosida loyihalashtirilgan" deb koʻrsatilmoqda. Shuningdek, telefon dizayni ikki yillik eski HTC modeliga juda oʻxshashligi, bu esa qurilmaning shunchaki rebrending qilingan variant ekanligini anglatishi mumkinligi qayd etilgan. Hozircha Trump Mobile ushbu holat boʻyicha rasmiy izoh bermadi.
