Tottenhem qishda Goretckani olish niyatida emas

«Bavariya» yarim himoyachisi Leon Goretcka qishki transfer oynasida «Tottenhem»ga ko‘chib o‘tmaydi. Bu haqda euro-football.ru xabar beradi.

So‘nggi kunlarda 30 yoshli futbolchi «shporlar»ning asosiy nishonlaridan biri sifatida tilga olingandi, biroq Germaniyada bu gap-so‘zlar tasdiqlanmayapti. Taniqli jurnalist Florian Plettenberg xabariga ko‘ra, «Tottenhem» Goretckani transfer qilish ustida ishlamayapti. Hozircha yanvar oyida yarim himoyachining «Bavariya»ni tark etishiga ishora qiladigan hech narsa yo‘q.

Goretckaning myunxenliklar bilan amaldagi shartnomasi yarim yildan keyin yakunlanadi, ammo klub mavsum davomida u bilan xayrlashishni istamayapti. Bosh murabbiy Vensan Kompani hamon tajribali nemis futbolchisiga tayanmoqda.