Arrigo Sakki A Seriyaning eng yaxshi hujumchisi sifatida Hoylunni tanladi

Italiyada katta obro‘-e’tiborga ega, «Milan»ni uning eng yorqin davrida boshqargan Arrigo Sakki A Seriyada eng yaxshi markaziy hujumchi kimligi borasida o‘z tanlovini bildirdi. Mutaxassisning fikricha, daniyalik forvard Rasmus Hoylunning o‘yini juda kuchli taassurot qoldirmoqda. Bu haqda euro-football.ru xabar beradi.

«Markaziy hujumchi sifatida men Hoylunni tanlagan bo‘lardim. Konte qo‘l ostida u qanday o‘sishga erishganini ko‘rdingizmi? «Manchester Yunayted»da u hech qachon bunday bo‘lmagan», — deya Sakkining so‘zlarini keltiradi calcionapoli1926.it.

Eslatib o‘tamiz, neapolliklar hozirda A Seriya turnir jadvalida uchinchi o‘rinda bormoqda. Yakshanba kuni jamoa «Latsio»ga qarshi maydonga tushadi.