Saudiyalik jurnalist Ronalduni ustun qoʻymasliklarini taʼkidladi
Krishtianu Ronaldu klub boshqaruvidan norozi ekanini bildirib, «Al-Nasr»ning ayrim uchrashuvlarini boykot qilayotgani haqida xabarlar tarqaldi. Vaziyatga munosabat bildirgan saudiyalik teleboshlovchi Valid al-Faraj yulduz futbolchining maqomi qoidalardan ustun qoʻyilmasligini aytdi. Bu haqda euro-football.ru xabar beradi.
Al-Farajning taʼkidlashicha, Saudiya Arabistonidagi sport tizimi va liga reglamenti «qizil chiziq» hisoblanadi: jahon yulduzi bo‘lish tartibni buzishga asos bo‘la olmaydi. U Ronalduni reglamentni hurmat qilishga va qonunlarga rioya etishga chaqirib, «biz Ronaldu oldida tiz cho‘kmaymiz, mamlakatimiz va ligamiz hammasidan ustun», degan fikrlarni ilgari surdi.
Maʼlumot uchun, Krishtianu Ronalduning «Al-Nasr» bilan amaldagi shartnomasi 2027 yilning o‘rtalarigacha mo‘ljallangan.
