Djikiya maosh muammosi sabab RPL variantlarini ko'rib chiqmoqda

Rossiyalik himoyachi, hozirda "Antalyaspor" safida to'p surayotgan Georgiy Djikiyaning kelajagi borasida uning agenti Malik Arutyunov fikr bildirdi. Bu haqda euro-football.ru xabar beradi.

Agentning aytishicha, futbolchi klubdagi maosh kechikishlaridan norozi va shu sabab Rossiya Premyer-ligasidagi jamoalardan tushayotgan takliflarni ko'rib chiqmoqda. Qayd etilishicha, to'lovlar noyabr oyidan beri ushlanib kelmoqda, biroq Djikiya Turkiyadagi sharoitlardan umuman olganda mamnun.

32 yoshli himoyachi "Antalyaspor"ga o'tgan yil yozida qo'shilgandi. U turk klubi bilan ikki yillik shartnoma imzolagan.

Joriy mavsum Turkiya Superligasida Djikiya 12 ta uchrashuvda maydonga tushdi. U ikki gol urdi va uch bor sariq kartochka oldi.