Jezush Ronalduga yaqin o'yin oldidan dam berdi
«Al-Nasr» bosh murabbiyi Jorje Jezush Krishtianu Ronaldu nega navbatdagi uchrashuvda maydonga tushmasligini izohladi. Bu haqda euro-football.ru xabar beradi.
Ar-Riyod klubi chorshanba kuni OFK Chempionlar Ligasi doirasida «Arkadag»ga qarshi bahs olib boradi. Portugaliyalik yulduz hujumchi tez orada maydonga qaytishi kutilayotgan bo'lsa-da, ushbu o'yinda ham uning ishtiroki rejalashtirilmagan.
Jezushning aytishicha, jamoa tig'iz taqvim sabab Ronaldu va asosiy tarkibdagi yana bir qator futbolchilarga dam berishga qaror qilgan. Murabbiy bu qarorni oldinda «Al-Fateh»ga qarshi muhim uchrashuv turgani bilan izohladi.
«Ronalduga dam berish yangilik emas. Bu Saudiya Arabistonidan tashqarida o'tadigan o'yinlarda u qatnashmay qolayotgan birinchi holat emas», — deya Jezushning so'zlarini keltiradi Al Nassr Zone.
Saudiya chempionatidagi «Al-Fateh» — «Al-Nasr» uchrashuvi shanba, 14-fevral kuni bo'lib o'tadi.
