Erik Garsiya Barselonani tark etishga bir qadam qolgandi
«Barselona» himoyachisi Erik Garsiya o‘tgan yil klubni tark etishga juda yaqin bo‘lganini aytdi. Bu haqda euro-football.ru xabar beradi.
Futbolchining so‘zlariga ko‘ra, u 2025 yil yanvarida Italiya «Komo»siga o‘tishga deyarli kelishib qo‘ygandi, biroq bitim yakuniga yetmadi. Shundan so‘ng Garsiya «ko‘k-anorranglilar»ning asosiy tarkibidan o‘rin olib, imkoniyatdan unumli foydalandi.
«Bir payt shunday tuyulgandi: men «Komo»ga ketaman. Ammo «Benfika»ga qarshi o‘yin hammasini o‘zgartirdi. Flik bilan gaplashganimdan keyin qolishga qaror qildim va hozir ayta olaman — bu to‘g‘ri tanlov bo‘lgan», — deya Garsiyaning fikrini ispan OAV keltirdi.
Garsiya uchun burilish nuqtasiga aylangan «Benfika» bilan bahs Chempionlar ligasining o‘tgan mavsumidagi umumiy bosqich doirasida bo‘lib o‘tgan va «Barselona» 5:4 hisobida zafar quchgan. O‘sha uchrashuvda himoyachi gol ham urgan.
