Ronaldu 30 yoshdan keyin 500 ta gol marrasidan oshdi

«Al-Nasr» hujumchisi Krishtianu Ronaldu 30 yoshga toʻlgandan keyin urgan gollari sonini 500 taga yetkazdi. Bu haqda euro-football.ru xabar beradi.

Portugaliyalik yulduz Saudiya Arabistoni chempionatining shanba kungi «Al-Hazm»ga qarshi uchrashuvida 13-daqiqada hisobni ochdi va bu gol uning 30 yoshdan keyingi 500-goli boʻldi. Oʻyin yakuniga yaqin esa u yana bir bor raqib darvozasini ishgʻol qilib, 501-golini ham qayd etdi.

Umuman olganda, Ronaldu faoliyati davomida 964 ta gol urgan. Shundan kelib chiqib, u toʻplarning katta qismini soʻnggi 11 yil ichida kiritgan.

Joriy Saudiya ligasi mavsumida 41 yoshli futbolchi 20 marta gol urdi. U toʻpurarlar poygasida Ayven Toni (23) va Xulian Kinones (21)dan keyin uchinchi oʻrinda bormoqda.