Yangi uy Natan Akening transferi mish-mishlarini uyg'otdi
\"Manchester City\" himoyachisi Natan Akening o\'zining sobiq klubi \"Chelsea\"ga qaytishi mumkinligi haqida mish-mishlar tarqalmoqda. The Sun nashri xabarlariga ko\'ra, niderlandiyalik futbolchi ayni paytda \"Chelsea\" mashg\'ulot bazasiga juda yaqin joylashgan hashamatli uyni qayta qurmoqda va bu uning \"Stemford Brij\"ga o\'tishi haqidagi taxminlarni kuchaytirmoqda.
Himoyachi ushbu xususiy mulkni o\'tgan yilning noyabr oyida 4 million funt sterlingga sotib olgan edi. Endilikda u mavjud binoni buzib, yettita yotoqxona, keng mehmonxona va sovrinlar uchun maxsus xonani o\'z ichiga olgan ulkan yangi qasr qurishni rejalashtirmoqda.
Natan Ake avvalroq 2011-yildan 2017-yilgacha \"Chelsea\" safida to\'p surgan. \"Bournemouth\"da uch yil o\'tkazgach, u \"Manchester City\" tomonidan 45,3 million yevroga sotib olingan. So\'nggi paytlarda futbolchi asosiy tarkibdan muntazam joy olishda qiynalmoqda va bu uni jamoani tark etish haqida o\'ylashga majbur qilmoqda. Uning klub bilan amaldagi shartnomasi 2027 yil 30-iyungacha mo\'ljallangan.
