Arne Slot: "Klub, muxlislar va rahbariyat qo‘llab-quvvatlashi kuchli"
“Liverpul” bosh murabbiyi Arne Slot APL doirasidagi “Fulhem”ga qarshi o‘yin oldidan o‘tkazilgan matbuot anjumanida jamoa atrofidagi qo‘llab-quvvatlash haqida fikr bildirdi.
Uning taʼkidlashicha, klub ichidagi ishonch va birdamlik yuqori darajada saqlanib turibdi. Ayniqsa, Chempionlar Ligasidagi og‘ir mag‘lubiyatdan keyin ham qo‘llab-quvvatlash susaymagan. 8 aprel kuni mersisaydliklar UYEFA Chempionlar ligasi chorakfinalining ilk uchrashuvida PSJga 0:2 hisobida yengilgan edi.
Slot bu holatda eng muhimi — klub tomonidan berilayotgan ishonch ekanini alohida qayd etdi. Uning so‘zlariga ko‘ra, faqat rahbariyat emas, balki sport direktorlari Richard Hyuz va Maykl Edvards ham jamoani to‘liq qo‘llab-quvvatlab kelmoqda.
Shu bilan birga, murabbiy muxlislarni ham alohida tilga oldi. U hatto og‘ir mag‘lubiyatlardan keyin ham tribunalarda qo‘shiqlar to‘xtamaganini, ishqibozlar jamoaga ruhiy kuch berib kelayotganini aytdi. Manchester Sitiga qarshi 0:4 hisobidagi mag‘lubiyatdan keyin ham muxlislar “Liverpulni yaxshi ko‘ramiz” deb qo‘shiq aytganini esladi.
“Vaziyatni to‘liq tushunamiz, lekin men har tomonlama kuchli qo‘llab-quvvatlashni his qilyapman,” — dedi Slot, deb xabar qiladi BBC.
Hozirgi paytda jamoa uchun eng asosiy vazifa — psixologik barqarorlikni saqlash va keyingi o‘yinlarga maksimal tayyorgarlik ko‘rish. Slotning bayonoti esa “Liverpul” atrofida hali ham ishonch va birdamlik yuqori ekanini ko‘rsatmoqda.
