Joe Gomez Liverpulni tark etishi mumkinligini istisno qilmadi
Liverpul himoyachisi Joe Gomez jamoadagi kelajagi borasida noaniqliklar mavjudligini tan oldi. Futbolchining amaldagi shartnomasi yakunlanishiga bir yil qolgan bir paytda, u yozgi transfer oynasida klubdan ketishi mumkinligini ochiqchasiga aytdi. Bu haqda Goal.com xabar beradi.
Arne Slot qo‘l ostida o‘yin amaliyoti kamayib borayotgan 28 yoshli himoyachi so‘nggi ikki mavsumda Angliya Premer-ligasida bor-yo‘g‘i oltita o‘yinda asosiy tarkibda maydonga tushdi. Klub esa o‘z navbatida yosh himoyachilarni jalb qilish orqali tarkibni yangilashga harakat qilmoqda.
Gomez o‘z intervyusida: "Hamma narsa bo‘lishi mumkin. Rostini aytsam, nima bo‘lishini bilmayman. Shartnomam tugashiga bir yil qoldi, ammo taqdirda nima bo‘lsa, o‘sha bo‘ladi. Liverpulda o‘tkazgan 11 yilim uchun har doim minnatdor bo‘laman", - deya ta’kidladi.
2015-yilda Charlton jamoasidan kelgan Gomez Liverpul safida 272 ta o‘yin o‘tkazib, Angliya Premer-ligasi, Chempionlar ligasi va boshqa ko‘plab sovrinlarni qo‘lga kiritgan. Unga Nyukasl Yunayted va Aston Villa kabi klublar qiziqish bildirmoqda.
Liverpul rahbariyati yaqin orada qaror qabul qilishi kerak: futbolchi bilan shartnomani uzaytirish yoki uni tekinga qo‘yib yubormaslik uchun yozda transferga qo‘yish. Ibrahima Konate bilan yangi shartnoma masalalari va yangi himoyachilarning kelishi Gomezning jamoada qolish imkoniyatlarini yanada kamaytirishi mumkin.
