Rossiyada YouTube auditoriyasi keskin kamaymoqda
VTsIOM tahliliy markazi Rossiya foydalanuvchilarining videoservislarga boʻlgan qiziqishlari boʻyicha yangi tadqiqot natijalarini eʻlon qildi. Maʻlumotlarga koʻra, internet foydalanuvchilarining 95 foizi muntazam ravishda ixtisoslashgan platformalarda uzun gorizontal videolarni tomosha qiladi. Hozirda bozorda “VK Video” yetakchilik qilmoqda — uni soʻrovda qatnashganlarning 61 foizi tanlagan. Rutube va YouTube koʻrsatkichlari mos ravishda 49 va 44 foizni tashkil etmoqda. Bu haqda Ixbt.com xabar beradi.
Platformalardan foydalanish chastotasi boʻyicha ham “VK Video” oldinda bormoqda: foydalanuvchilarning 50 foizi ushbu servisdan haftasiga kamida bir marta foydalanadi. YouTube va Rutube platformalarida bu koʻrsatkich 42 va 35 foizga teng. Brendlarning tanilishi boʻyicha ham “VK Video” (57%) birinchi oʻrinda, YouTube (52%) va Rutube (50%) esa keyingi oʻrinlarni egallagan.
Tadqiqotning eng qiziqarli jihati shundaki, YouTube auditoriyaning chiqib ketishi boʻyicha yetakchilik qilmoqda. Foydalanuvchilarning 43 foizi ilgari ushbu platformadan foydalanganini, biroq hozirda undan voz kechganini bildirgan. Taqqoslash uchun, “VK Video”, Rutube, “Dzen” va “Odnoklassniki” kabi platformalarda auditoriya yoʻqotilishi ancha past (13-20%) darajada saqlanib qolmoqda.
Shuningdek, videoservislar anʻanaviy televideniyening oʻrnini egallayotgani kuzatilmoqda: foydalanuvchilarning 39 foizi TV-kontentni internet orqali tomosha qiladi. Respondentlarning 45 foizi kelajakda videoservislar televideniyeni butunlay siqib chiqarishini taxmin qilmoqda. Ushbu soʻrov 2026-yil aprel oyida 14 yoshdan oshgan 2 mingdan ortiq Rossiya fuqarolari oʻrtasida oʻtkazilgan.
