AI-startaplar qanday qilib soxta ARR koʻrsatkichlari bilan oʻzini koʻrsatmoqda
Oʻtgan oyda Spellbook huquqiy AI-startapi hammuassisi va bosh direktori Scott Stevenson X platformasida sunʼiy intellekt sohasidagi startaplar orasida avj olgan "katta firibgarlik"ni fosh qildi. Uning taʼkidlashicha, koʻplab kompaniyalar oʻzlarining yillik takrorlanuvchi daromadlari (ARR) haqidagi maʼlumotlarni sunʼiy ravishda oshirib koʻrsatmoqda. "Dunyoning eng yirik fondlari PR maqsadida jurnalistlarni chalgʻitib, ushbu yolgʻon koʻrsatkichlarni qoʻllab-quvvatlamoqda", — deb yozadi Stevenson. Bu haqda Techcrunch.com xabar beradi.
ARR koʻrsatkichi anʼanaviy ravishda shartnoma asosidagi faol mijozlardan keladigan yillik daromadni hisoblash uchun ishlatiladi. Biroq, Stevenson va boshqa koʻplab soha vakillarining fikricha, AI-kompaniyalari ushbu metrikani tanib boʻlmas darajada oʻzgartirib yuborgan. TechCrunch nashri oʻndan ortiq muassislar, investorlar va moliya mutaxassislari bilan suhbatlashib, ushbu muammoning qanchalik keng tarqalganini oʻrgandi.
Manbalarning tasdiqlashicha, ommaviy bayonotlarda ARR koʻrsatkichlarini boʻrttirib koʻrsatish odatiy holga aylangan. Asosiy hiyla — hali amalga oshmagan, faqatgina kelishilgan shartnomalar (Contracted ARR yoki CARR) qiymatini oddiygina ARR deb taqdim etishdir. Bir investorning soʻzlariga koʻra, agar biror startap oʻz toifasida shunday qilsa, boshqalari ham raqobatda qolish uchun ushbu usuldan foydalanishga majbur boʻlmoqda.
ARR koʻrsatkichi bulutli texnologiyalar davridan beri mahsulot sotuvini baholashda ishonchli metrika hisoblanib kelgan. Biroq, bu koʻrsatkich buxgalterlar tomonidan rasman audit qilinmaydi, chunki GAAP (umumiy qabul qilingan buxgalteriya tamoyillari) kelajakdagi daromadga emas, balki allaqachon yigʻilgan tarixiy daromadga eʼtibor qaratadi. Bu esa AI-startaplariga oʻz moliyaviy holatini haqiqatdan koʻra yaxshiroq koʻrsatish imkonini bermoqda.
