Kinopoisk yangilandi: Shaxsiy profillar, telekanallarni orqaga qaytarish va oʻyinlar
Yandex jamoasi oʻzining Kinopoisk onlayn kinoteatri uchun navbatdagi yirik yangilanishlarni taqdim etdi. Endilikda foydalanuvchilar shaxsiy profillarini kastomizatsiya qilish imkoniyatiga ega boʻldilar. Sahifa uchun maxsus fon va tavsif tanlash, shuningdek, koʻrishlar tarixi hamda baholarni yashirish orqali maxfiylik sozlamalarini oʻzgartirish mumkin. Bu haqda Ixbt.com xabar beradi.
Servisning veb-talqini, iOS ilovasi va aqlli televizorlar uchun moʻljallangan dasturlarida telekanallarni orqaga qaytarish funksiyasi joriy etildi. Endi jonli efirni toʻrt soatgacha boʻlgan vaqt oraligʻida ortga qaytarib koʻrish mumkin. Pleyerdagi maxsus slayder yordamida translyatsiyaning istalgan nuqtasiga oʻtish imkoniyati yaratildi.
Mobil ilovalarda film va seriallar sahifasiga kirganda treylerlarning avtomatik tarzda ijro etilishi yoʻlga qoʻyildi. Shuningdek, foydalanuvchilar eksklyuziv kontentlarga kirish huquqini beruvchi «Smotrim» obunasini ham xarid qilishlari mumkin boʻladi.
Televizorlar uchun moʻljallangan «Igromir» boʻlimida endi Steam platformasidan sotib olingan oʻyinlarni va free-to-play loyihalarni oʻynash imkoniyati mavjud. Hozirda ushbu boʻlim YaOS X operatsion tizimida ishlovchi qurilmalarda faol, tez orada esa YaOS va Android TV tizimidagi televizorlarda ham paydo boʻladi.
