Rossiyalik kosmonavtlar 2026-yilda ilk bor ochiq kosmosga chiqishdi
Xalqaro kosmik stansiyaning Rossiya segmenti kosmonavtlari Sergey Kud-Sverchkov va Sergey Mikaev chiqish lyukini ochib, 2026-yildagi ilk koinot faoliyatini (VKD-66) boshladilar. Roskosmos tomonidan olib borilayotgan toʻgʻridan-toʻgʻri translyatsiyaga koʻra, kosmonavtlarning ochiq koinotda boʻlish muddati 5 soat 27 daqiqa etib belgilangan. Bu haqda Ixbt.com xabar beradi.
MKS-74 ekspeditsiyasi komandiri Sergey Kud-Sverchkov uchun bu faoliyatidagi ikkinchi, bortmuhandisi Sergey Mikaev uchun esa birinchi ochiq kosmosga chiqishdir. Ularga stansiya ichidan Andrey Fedyaev yordam bermoqda — u ERA Yevropa masofaviy manipulyatori boshqaruv pultida navbatchilik qilmoqda.
Missiya ishtirokchilari oldiga Rossiya segmentining turli modullarida bir qator ilmiy-texnik vazifalar qoʻyilgan. Asosiy maqsad — «Zvezda» xizmat moduliga «Solntse-Teragerts» yangi tajriba qurilmalarini oʻrnatish va ularni ulashdan iborat.
Bundan tashqari, «Orlan-MKS» skafandridagi kosmonavtlar «Nauka» laboratoriya moduliga oʻtib, «Ekran-M» apparaturasidan materiallar solingan kassetani demontaj qilishadi. Yakuniy bosqichda esa «Poisk» modulida oʻrnatilgan «Biorisk-MSN» biologik uskunalar konteyneri yigʻib olinadi. Barcha yirik yuklarni tashish va montaj jarayonlari ERA robot-manipulyatori koʻmagida amalga oshiriladi.
