Эҳтиёжманд оилаларга иситиш мавсумида 1 миллион сўмдан берилади

Ўзбекистонда иситиш мавсуми бошланиши билан ижтимоий ҳимояга муҳтож оилаларга 1 миллион сўмдан моддий ёрдам ажратиш жараёни йўлга қўйилди.

Президент қарорига мувофиқ, бу йил мамлакат бўйлаб 1,1 миллиондан ортиқ оила қўллаб-қувватлов рўйхатига киритилган. Улардан 822 мингтаси ижтимоий реестрда, яна 290 мингдан зиёд оила “Маҳалла еттилиги” томонидан қўшимча аниқланган.

Қўшимча ёрдам оладиган тоифалар қаторига қуйидагилар киради:

• боқувчисини йўқотган оилалар – 33,8 мингта;
• ногиронлиги бўлган аъзоси борлар – 76,3 мингта;
• оғир касал аъзоси яшайдиганлар – 23,7 мингта;
• ёлғиз кексалар – 7 мингта;
• газ тармоғига уланмаганлар – 2 мингта;
• бир хонадонда уч ва ундан ортиқ оила яшайдиганлар – 26,2 мингта;
• боқувчиси меҳнат миграциясида бўлганлар – 34,7 мингта;
• вақтинча ишсизлар – 15,1 мингта;
• фақат пенсия ҳисобига яшовчи оилалар – 69,7 мингта;
• ёлғиз яшовчи фуқаролар – 2,3 мингта.

Мазкур ташаббус иситиш мавсумида аҳолининг ижтимоий заиф қатламларини молиявий қийинчиликлардан ҳимоя қилишга қаратилган.