Полша ЕИдан украиналик қочқинлар учун пул ажратишини сўради

^{Фото: Getty Images}
Полша Европа иттифоқи мамлакатдаги украиналик қочқинлар таъминоти учун маблағ ажратишини кутмоқда. Бу ҳақда Полша бош вазири Матеуш Моравецкий айтди.

Унинг сўзларига кўра, Полша урушдан қочиб қутулган 2,5 млн нафар украиналикка \"ўз эшиклари ва қалбини очди\". Бундан ташқари, Полша украиналик ярадор ҳарбийларга ёрдам бермоқда.

\"Бунинг учун бизга пул керак\", - деб таъкидлади у ва Евроиттифоқ ҳозирча Варшавага \"бир цент ҳам\" ажратмаганини қўшимча қилди.

\"Биз адолатли муносабатни хоҳлаймиз. Туркияга охирги марта қочқинлар келганида миллиардлар билан қўллаб-қувватлашганди. Ҳозир биз ҳам ЕИ ёрдам кўрсатишига муносибмиз\", - деди Матеуш Моравецкий.