АҚШдаги мактабда 6 ёшли ўқувчи ўз ўқитувчисини отиб қўйди

^{Фото: The Virginian-Pilot}
АҚШнинг Виржиния штати Ньюпорт-Ньюс шаҳрида бошланғич мактабнинг олти ёшли биринчи синф ўқувчиси ўз ўқитувчисига ўқ узди, деб ёзади The Virginian-Pilot газетаси.

Шаҳар полицияси бошлиғи Стив Дрю маълум қилишича, ўқувчи ва ўқитувчи ўртасида келишмовчилик юзага келган, шундан кейин болакай унга тўппончадан ўқ узган. «Ўқ тасодифан отилмаган», — дея таъкидлади полициячи.

30 ёшли ўқитувчи ҳаёт учун хавфли жароҳат олган ва касалхонага ётқизилган. Ўқувчилардан ҳеч бири жабрланмаган. Ўқ узган ўқувчи қўлга олинган. Терговчилар у тўппончани қаердан олганини аниқлаштирмоқда.

Ньюпорт-Ньюс таълим департаменти раҳбари Жорж Паркер III мактабда дарслар бекор қилинганини, ҳукумат «ходимлар ва ўқувчилар руҳий саломатлиги устида ишлаётгани»ни айтди.