Туркия ички ишлар вазирлиги биноси яқинида теракт содир бўлди

Анқарадаги Ички ишлар вазирлиги биноси яқинида терактга уриниш содир бўлди, деб хабар берди ички ишлар вазири Али Ерликая ўзининг X (собиқ Twitter) саҳифасида.

«Тахминан 9:30 ларда ИИВ бош қўриқлаш бошқармасининг кириш эшигига енгил тижорат автомобилида келган икки нафар террорчи портлаш содир этди. Террорчилардан бири ўзини портлатган, иккинчиси эса зарарсизлантирилган. Икки полициячи енгил жароҳат олди», — деб ёзади у.

Маълумотларга кўра, портлашдан сўнг отишма ҳам содир бўлган. Ҳозирда ҳудудда кучайтирилган хавфсизлик чоралари кўрилган.