Туркиянинг Шонлиурфа вилоятидаги мактабда отишма: 16 киши яраланди

Фото: Hurriyet

Туркиянинг Шонлиурфа вилояти Сиверек туманида жойлашган касб-ҳунар ва техника лицейида оғир воқеа — отишма содир бўлди. Ҳодиса маҳаллий аҳоли ва таълим тизимида катта шок уйғотди.

“Hürriyet” нашри маълумотига кўра, қуролланган шахс лицей ҳудудига ов милтиғи билан кириб келган ва бино ичи ҳамда атрофида тартибсиз равишда ўт очган. Бу эса вазиятни бир зумда назоратдан чиқариб юборган.

Шонлиурфа вилояти губернатори Ҳасан Шилдак билдиришича, ҳодиса оқибатида жами 16 киши турли даражада жароҳат олган. Шифокорлар икки ўқитувчи ва икки ўқувчининг аҳволини ўртача оғир деб баҳолашган.

Расмий маълумотларга кўра, ҳужумни амалга оширган 19 ёшли шахс мазкур таълим муассасасининг собиқ ўқувчиси бўлган. Унинг нияти ва мотивлари ҳозирча аниқланмаган.

Гувоҳларнинг таърифлашича, у мактабнинг асосий кириш эшигидан кириб, қўлидаги узун стволли қурол билан аввал ташқи ҳудудга, сўнгра эса бино ичига қарата ўт оча бошлаган. У йўлида учраган ҳар қандай кишига ўқ узгани айтилади.

Ҳуқуқ-тартибот идоралари тезкор аралашувидан сўнг ҳужум қилган шахс ўз жонига қасд қилгани хабар қилинди. Ҳодисанинг аниқ сабаблари бўйича тергов ишлари давом этмоқда.

Бу воқеа яна бир бор таълим муассасалари хавфсизлиги масаласини кун тартибига олиб чиқди.