Қирғизистонда қишлоқ номлари ўзгаради: янги қоидалар жорий этилмоқда
Қирғизистон президенти Садир Жапаров мамлакатдаги рус тилидаги қишлоқ номларини босқичма-босқич қирғиз тилига алмаштириш режаси ҳақида маълум қилди. Унинг айтишича, ушбу жараён 2027 йилга қадар тўлиқ якунланиши кўзда тутилган.
Давлат раҳбари бу ташаббус миллий қадриятлар ва тилни мустаҳкамлаш, шунингдек, тарихий номларни тиклашга қаратилганини таъкидлади. Шу орқали мамлакатдаги географик номларнинг ягона миллий руҳда бўлиши таъминланади.
Шу билан бирга, президент қишлоқларга шахслар номи берилишини чеклаш бўйича янги қоида жорий этилганини ҳам билдирди. Унинг фикрича, тарихий шахсларнинг номи аллақачон халқ хотирасида муҳрланиб бўлган ва буни қўшимча равишда жой номларида акс эттириш шарт эмас.
“Олимбек додхонинг номи аллақачон тарихда ўз ўрнига эга. Қишлоқ унинг номи билан аталгани учун тезроқ тараққий этмайди”, — дея қайд этди Садир Жапаров.
Мутахассислар фикрича, мазкур ўзгаришлар миллий ўзликни мустаҳкамлашга хизмат қилиши мумкин, бироқ айрим ҳудудларда аҳоли томонидан турлича қабул қилиниши эҳтимоли ҳам йўқ эмас.
