Тошкентда инфокиоскани ўғирлаб, уни каналга ташлаб юборган эркак ушланди

Тошкент шаҳрида дўкон қаршисидаги инфокиоскани ўғирлаб кетган эркак ушланди. Бу ҳақда “Тошкент” телеканали орқали эфирга узатилган лавҳада маълум қилинди.

Қайд этилишича, ҳуқуқ-тартибот идораларига Миробод туманида номаълум эркак озиқ-овқат дўконига ўрнатилган Paynet инфокиоскасини ўғирлаб кетгани тўғрисида хабар келиб тушган. Мазкур терминал қиймати 31 миллион сўмга тенг.

ИИБ ходимларининг саъй-ҳаракати билан ўғирликда гумонланган шахс қўлга олинган. Сўроқ давомида 33 ёшли Б. инфокиоскани очиб 7 миллион сўмни олгани, кейин терминални каналга ташлаб юборганини билдирган.

Шунингдек, эркак кучли таъсир қилувчи дори воситалари таъсирида бўлганини айтган.

“Ўша куни ‘Перегабалин’ ичгандим (тутақаноққа қарши дори — таҳр.). Одатда кунига биттадан ичаман. Қилган ишимдан пушаймонман, бошқа бундай қилмасликка ваъда бераман”, — дейди гумонланувчи.

Ҳолат юзасидан Жиноят кодексининг 169-модда (Ўғирлик) 2-қисми билан жиноят иши қўзғатилган.