Кевин Де Бруйне машғулотда жароҳат олди: Антонио Конте тафсилотларни очиқлади
Италия А Сериясининг навбатдаги туридан ўрин олган Болоня жамоасига қарши баҳс олдидан Наполи жиддий йўқотишга учради. Жамоа етакчиси Кевин Де Бруйне машғулотлардаги тўқнашув сабабли ўйин қайдномасидан четда қолди. Бу ҳақда Goal.com хабар беради.
Бош мураббий Антонио Конте ДАЗН телеканалига берган интервюсида белгиялик ярим ҳимоячининг жароҳати ҳақида маълумот берди. Унинг сўзларига кўра, машғулот вақтида жамоадоши билан тўқнашиб кетган футболчининг юз қисми жиддий шикастланган.
"Машғулотда бош билан тўқнашув юз берди ва унинг ёноқ суяги ёрилиб кетди. Шифокорлар тўрт чок қўйишди. Бош мия жароҳати аниқланмаган бўлса-да, у майдонга туша олмайди", — деди Антонио Конте.
Шунга қарамай, Наполи таркибида ижобий янгилик ҳам бор. Жамоа сардори Гиованни Ди Лорензо сафга қайтди ва асосий таркибда майдонга тушди. Антонио Конте сардорнинг қайтиши жамоа учун катта руҳий ва тактик устунлик эканлигини таъкидлади.
