Боатенг Барселонага нега келди?

Германия миллий терма жамоаси ва Мюнхеннинг \"Бавария\" клуби собиқ футболчиси Жером Боатенг Каталониянинг \"Барселона\" клуби машғулот майдончасида кўринди. Бу ҳақда \"кўк-анорранглилар\" матбуот хизмати хабар берди.

\"Хуш келибсиз, Жером Боатенг\", - дейилади \"Барселона\"нинг ижтимоий тармоқдаги хабарда. Ташриф давомида Боатенг \"Бавария\"нинг собиқ бош мураббийи Ханс-Дитер Флик, мюнхенликлар собиқ ҳужумчиси Роберт Левандовски ва \"Барселона\"нинг бошқа футболчилари билан суҳбатлашди.

Жером \"Барселона\" базасида бир неча кун вақт ўтказади. Эслатиб ўтамиз, у 37 ёшида футболчилик фаолиятини якунлаган.