Ювентус Кенан Йилдизни сақлаб қолмоқчи

Ювентус клуби Кенан Йилдиз билан шартномани узайтиришни режалаштирмоқда. Клубнинг туркиялик футболчи билан янги келишувга эришиш нияти аллақачон маълум қилинган, аммо ҳозирча шартлар бўйича келишувга эришилмаган.

Вазиятни Англия Премьер-лигасининг йирик клубларининг 20 ёшли ҳужумчига қизиқиши янада мураккаблаштирмоқда. Инсайдер Николо Скира берган маълумотларга кўра, Ювентус Йилдизга Рождество байрамигача яхшиланган шартнома таклиф қилади.

Маълумотларга кўра, янги шартнома бўйича футболчининг йиллик маоши бонуслар билан бирга 5-5,5 миллион евро атрофида бўлиши кутилмоқда. Бонуслар Чемпионлар лигасига йўлланма қўлга киритилганда кучга киради.

Шунингдек, яқинда Кенан Йилдизнинг агенти билан Лондоннинг Арсенал клуби вакиллари боғлангани ҳақида хабарлар тарқалди. Унинг ҳозирги шартномаси 2029-йилгача амал қилади.