Майнц янги бош мураббийини эълон қилди

Майнц жамоаси ҳафта охирида янги бош мураббийни расман эълон қилди. Эндиликда жамоани 59 ёшли швейцариялик мутахассис Урс Фишер бошқаради.

У клуб билан 2028 йилнинг ўрталарига қадар мўлжалланган шартнома имзолаган. Ўтган ҳафта Майнц Бо Ҳенриксен билан ҳамкорликни якунлаганди.

Шундан сўнг жамоа ўз майдонида Боруссия Мёнхенгладбахга минимал 0:1 ҳисобида мағлуб бўлди. Ҳозирда Майнц Германия Бундеслигаси турнир жадвалида 18-ўринни эгаллаб турибди.

Жамоа ўтган 13 турда бор-йўғи 6 очко тўплай олди. Майнцнинг навбатдаги ўйини 11 декабрь куни Конференциялар лигаси доирасида сафарда Лех клубига қарши бўлиб ўтади.