Реал Мадрид ёш ҳимоячи қидирмоқда

Мадриднинг "Реал" клуби 2026-йилда ҳимоя чизиғини кучайтиришни режалаштирмоқда. "Қироллик" клуби нафақат юлдуз футболчиларнинг эркин агентларига, балки ёш ва истеъдодли ўйинчиларга ҳам эътибор қаратмоқда.

Журналист Маттео Моретто берган маълумотларга кўра, "Реал" раҳбарияти катта салоҳиятга эга марказий ҳимоячини таркибга қўшишни истамоқда. Уларнинг асосий номзодларидан бири Франциянинг "Ренн" клуби аъзоси, 20 ёшли Жереми Жакедир, унга қизиқиш аллақачон билдирилган.

Якшанба куни "Реал" Испания Ла Лигасининг 17-тури доирасида сафарда "Алавес"га қарши майдонга тушади. Ушбу учрашувда мағлубият ёки дуранг натижа қайд этилса, бош мураббий Хаби Алонсо истеъфога чиқарилиши эҳтимоли мавжуд.