Федерико Бернардески олти ҳафтага сафдан чиқди

Болонья клуби жамоанинг ҳужумкор ярим ҳимоячиси Федерико Бернардески Италия Суперкубоги ярим финалида Интерга қарши учрашувда ўмров суягини синдириб олганини маълум қилди. 19-декабрь куни Саудия Арабистонининг Ар-Риёд шаҳрида бўлиб ўтган баҳснинг асосий вақти 1:1 ҳисобида якунланди.

Шундан сўнг Болонья пеналтилар сериясида 4:3 ҳисобида устун келиб, финал йўлланмасини қўлга киритди. Яқин душанба куни бўлиб ўтадиган финалда жамоа Наполи билан тўқнаш келади.

Клуб баёнотига кўра, Бернардескига жарроҳлик амалиёти керак бўлади ва у сешанба куни ўтказилиши режалаштирилган. Футболчи тахминан олти ҳафта майдондан четда қолади ва шу боис Суперкубок финалида жамоасига ёрдам бера олмайди.

Бернардески жорий мавсум 22 ўйинда 4 та гол урган.