Давид Трезеге Буэнос-Айресда «Ривер Плейт» раҳбариятига қўшилди

Туриннинг «Ювентус» клуби ва Франция терма жамоаси собиқ ҳужумчиси Давид Трезеге Аргентинага қайтди. У аввалроқ Буэнос-Айресдаги «Ривер Плейт» сафида ҳам тўп суриб, Аргентина футболи иккинчи лигасида чемпионликни қўлга киритган эди. Бу ҳақда euro-football.ru хабар беради.

Эндиликда Трезеге «Ривер Плейт»га майдондаги эмас, бошқарувдаги ролда қайтмоқда — у клуб раҳбарияти таркибидан ўрин олади. Клуб собиқ футболчини барча раҳбарлар иштирокида тақдимот маросими орқали таништирди.

Трезегенинг жамоа ичидаги аниқ лавозими ҳозирча расман очиқланмаган. Бироқ тақдимотда у стратегик масалалар билан шуғулланиши ва «Ривер Плейт»ни институционал даражада вакил қилиши маълум қилинди.

Эслатиб ўтамиз, француз футболчи профессионал фаолиятини 2015 йилда якунлаган.