Икарди хет-трик қилди ва «Галатасарай» рекордини янгилади

Туркия чемпионатининг 22-турида «Галатасарай» «Эюпспор»ни йирик ҳисобда мағлуб этди — 5:1. Учрашувнинг бош қаҳрамони аргентиналик ҳужумчи Мауро Икарди бўлиб, у учта гол урди. Бу ҳақда euro-football.ru хабар беради.

Икардининг бу ўйиндаги хет-трики клуб тарихидаги муҳим натижани ҳам тақдим этди: у «Галатасарай» сафида энг кўп гол урган легионерга айланди. Мауро жами 76 та гол билан руминиялик Георге Ҳажи (75) кўрсаткичини ортда қолдирди.

Клубнинг умумий тўпурарлари рўйхатида эса Икарди ҳозирча еттинчи поғонада бормоқда. Эслатиб ўтамиз, у «Галатасарай»да 2023 йилдан бери тўп суради, бунгача француз «ПСЖ» шарафини ҳимоя қилган.